شط غناوينا

السلام عليكم ورحمة الله وبركاته

خربشة حزينة بين سطور العمر
أطوّيها

شـــط غناوينا
................


كل الجراح
فى كل الغناوى الحزينة
ع الناى بتصرخ،،
على حلم ميّت
كان من زمن عدّى
مــــــــــــــوال
عايش فى عمر السنين

****

جوة القلوب
وسط العيون الضنينة
ويّا الدموع نازل
ع الخدود يجرى
زى الطوفان
فى ثورة همجيّة
شايل سفينة قلوبنا الخضرا
لشط غناوينا الحزينة

****

تحت الشجر قاعد
على يمينى الغيط باير
وعلى شمالى
الفقر مالى الناحية والداير
-جاتنى البنات-
حلّة الضفاير
والساقية دايرة تولول
مع غنوتى ع الناى
بتصرخ
ع القمح اللى مات
جوّة السنابل
والفول اللى عطشه طوّل
والقطن اللى كان فى الأول
بيغنى وسط الغيطان
ولونه الأبيض
حرير
كاسى كل العيدان

****

قُمنا رجعنا من الأوّل
لشط غناوينا
والفقر اللى ضارب أراضينا
ولا مرة عمرنا نسينا
ولا مرة عمرنا رضينا
بس سكوتنا ع الشط طوّل
وسكتت معاه كل غناوينا